အခုဆို သားတို့ကို ကျွေးမွေးခဲ့တာ
နှစ်နှစ်ဆယ် ကျော်ခဲ့ပါပြီ
အမေ့ကျေးဇူးကို ဒီနေ့ထိ
တရက်မှ မမေ့နိုင်ခဲ့တာ အသေအချာပါ
ငယ်စဉ်တောင်ကျေး
ကလေးဘဝထဲက ကျွေးမွေးစောင့်ရှောက်
ပြုပြင်ပေးခဲ့တာ အမေပါဗျာ
သိတာတခုက အခုရွယ်ထိ အမေ့ကျေးဇူး
ဘာတခုမှကောင်းကောင်း
မပေးဆပ်နိုင်သေးတာပဲအမေ
သားတို့ငယ်ငယ်
ပါးစပ်လှုပ်တိုင်း သားတွေကို ထွေးပိုက်ပြီး
နို့ချိုတိုက်ခဲ့ဖူးတယ်နော်
အခုနေအခါ အမေပါးစပ်လှုပ်ရင်
ဘယ်သူတွေကများ ဂရုတစိုက် ထွေးပိုက်ပြီး
ကျွေးမွေးမှာပါလိမ့် သိချင်မိတယ်အမေ
ငယ်စဉ်ဘဝ ကျောင်းတက်စမှာ
အတန်းပြင် နေပူကျဲကျဲမှာ
အပြုံးမပျက် ထိုင်စောင့်ပေးခဲ့ဖူးတယ်နော်
အခုနေအရွယ် အမေဈေးဝယ်ရင်
မထစတမ်း ထိုင်စောင့်ပေးမယ့်သူဟာ
ဘယ်သူများ ဖြစ်လေမလဲ
ဈေးသည်တော့ မဟုတ်တန်ရာနော်အမေ
ကျောင်းသွားခါနီး
သနပ်ခါးလူးရင် ကိုယ်တိုင်သွေးပြီး
ပါးပြင်နုနုပေါ် ဝလုံးလှလှလေးတွေ
တင်ပေးခဲ့တာ မှတ်မိပါတယ် အမေ
အခုနေခါ အမေသနပ်ခါးလိမ်းရင်
ဘယ်သူတွေများ စောင့်ကြည့်ပြီး
သွေးပေးချင်လဲ သိချင်မိတယ်အမေ
တခါတရံ ခေါင်းသုတ်ပေးရင်း
အုန်းရည်လှုပ်တဲ့အသံကြားရင် ကလေးတို့ဘာဝ
ပျော်ရွှင်ရတာပေါ့
အခုနေအခါ အမေများခေါင်းလျှော်ရင်
ဘယ်သူတွေများ ဂရုတစိုက်
သုတ်ပေးချင်လဲ သိချင်မိတယ်အမေ
သားတို့ငယ်ငယ် ၆နှစ်အရွယ်မှာ
ပျင်းတိုင်းပုံပြောပြခဲ့ဖူးတယ်နော်
အခု၆၀ကျော်အရွယ် အမယ်အိုတယောက်ကို
အဖက်လုပ်ပြီး စကားပြောချင်သူကော
ဘယ်သူတွေများ ရှိသေးလဲ
သိချင်သေးရဲ့ အမေ
ကလေးတို့ဘာဝ ကစားကွင်းသွားချင်တိုင်း
အဝတ်အစားသစ်တွေ ဆင်ယင်ပြီး
နေရာစုံ လိုက်ပို့ခဲ့ဖူးတယ်နော်
အခုအရွယ် ရောက်တော့
တုန်ချိနေတဲ့ အမေ့လက်ကို ကိုင်ပြီး
ဘယ်သူတွေများ လိုက်ပို့ပေးမှာပါလိမ့်
တွေးပူမိတယ် အမေ
သားတို့ကငယ်ငယ် ကိုယ်တိုင်ဈေးဝယ်ပြီး
အမြဲ ချက်ကျွေးခဲ့ဖူးတယ်နော်
အခုအခါ အမေစားချင်သမျှ
ဂရုတစိုက်မေး ကျွေးမွေးပေးမယ့်သူ
အမေ့နားမှာ ဘယ်သူတွေများရှိသေးလဲ
ဖြေပေးပါဦးဗျာ
အခုခေတ်ခါ များပြားလာတဲ့
ဘိုးဘွားရိပ်သာတွေ တိုးတက်လာဖို့
အားကျိုးမာန်တက်လုပ်ဆောင်နေသူတွေဟာ
နောင်တခေတ်မှာ ဘယ်သူတွေများဖြစ်လာမလဲ
မှန်းကြည့်ပေးပါဦး အမေ
နိုင်ငံခြားမှာ အဟောင်းပစ္စည်း
လေလံဈေးနဲ့ တန်ဖိုးကြီး ပေး
အလုအယက်ပေးဝယ်ကြတယ်အမေ
ကိုယ့်ဆီမှာ ရှိတဲ့ပစ္စည်းလေးကို
တန်ဖိုးထားဖို့ နေနေသာသာ
အိမ်ထဲကအပြင်တောင် ထုတ်မကြည့်ပဲ
စွန့်ပစ်ထားရက်ကြတယ်အမေ
တွေးကြည့်ရင် ရယ်ချင်စရာပါ
အဟောင်းပစ္စည်း တန်ဖိုးထားသူတွေကို
အမေတွေ့နိုင်ပါတယ်
အိမ်မှာ ရှိနေတဲ့ နှစ်ခြောက်ဆယ်ကျော်
ပစ္စည်းလေး တခုကိုတော့
ဘယ်သူမှ တယုတရ တန်ဖိုးထား ရိုသေရမှန်း
မသိကြတော့ဘူး အမေ
နောက်ဆုံးပေါ်ပစ္စည်းမျိုးစုံ
ပိုက်ဆံရှိသလောက် ဝယ်နိုင်ပါတယ်
အိမ်မှာရှိတဲ့ တန်ဖိုးအကြီးဆုံး
အဟောင်းပစ္စည်းလေးကိုတော့
တန်ဖိုးထားသူ မရှိတော့ပါဘူးအမေ
ခေတ်တွေက ပြောင်းသွားပြီအမေ
လူတွေ စိတ်ထဲမှာ ပိုက်ဆံမှ ပိုက်ဆံ
အလုအယက် ဖြစ်နေကြပြီ
အဖိုးတန်တဲ့ အချိန်တွေကို
အဖိုးမတန်တဲ့ လူတွေဆီမှာ ရောင်းစားပြီး
အဖိုးတန်ခဲ့သူတွေကို
အဖိုးခနည်းနည်းတောင် ပြန်မပေးချင်တော့တဲ့
ခေတ်ကြီးရောက်ပြီအမေ
မေတ္တာ၊စေတနာကို တန်ဖိုးမထားသူတွေ
ကျေးဇူးမသိသူ၊ဘိုးဘွားပစ်မှားသူ ၊
ဆွေမျိုးညာတိ ပစ်ပယ်ထားသူ
များတဲ့ခေတ်မှာ လူဖြစ်ရတာလောက်
တန်ဖိုးမဲ့စရာ ရိ်ှမယ်မထင်ဘူးအမေ
တခါတလေတော့လဲ
လောကကြီးကို ဟားတိုက်ရယ်မောချင်မိတယ်
ငယ်ငယ်က ဂရုတစိုက်ကျွေးမွေးခဲ့သူတွေကို
အသက်ကြီးလို့ လိုအပ်တဲ့အခါ
ဘယ်သူတွေများ အနားရှိနေမလဲ
ကံကံ၏ အကျိုး
သားတော့ ယုံကြည်တယ်အမေ
မေတ္တာစူးတာ သံစူးတာမဟုတ်ဘူး
သံစူးရင် မေးခိုင်ကာကွယ်ဆေးထိုးပြီး
ကာကွယ်နိုင်တယ်အမေ
မေတ္တာစူးရင် ကုရန်နတ္တိ
ဆေးမရှိနိုင်တော့ဘူးလေ။
လူ့လောကမှာ အခက်အခဲပေါင်းစုံ
ကြုံဆုံခဲ့ရပါပြီ အမေ
ဒါတွေကို ကျော်လွှားဖို့ အားအင်တွေ
သားဆီမှာ အပြည့်အဝရှိခဲ့ပါပြီအမေ
အဲဒါအမေပေးခဲ့ဖူးတဲ့
မေတ္တာလက်နက်လေးတခုကြောင့်ပေါ့။
အခုအမေ အသက်ကြီးပြီ
အမေ့နားမှာ ဘယ်သူများမှ ရှိပါလေလိမ့်
သားကတော့ အမြဲသတိရနေဆဲပါ
ဘုရားမှာတော့ အမြဲဆုတောင်းမိပါသည်
နောက်ဆုံးထွက်သက်ထိ အမေ့နားမှာ
အမြဲနေနိုင်ရပါလို၏။
ကဗျာသစ်
၂၉.၆.၁၄
No comments:
Post a Comment